Way adkaan kartaa in la ogaado haddii waxa aad dareemayso uu dhab ahaantii yahay qulub, gaar ahaan haddii aad dareenkaas la nooleyd muddo dheer. Baaritaanka qulubku waxa uu kaa caawinayaa inaad hesho caawimaada aad u baahan tahay, hadii aad qabto qulub ama haddii kale. Waa kuwan siyaabo aad ku heli kartid baaritaanka qulubka oo lacag la'aan ah ama jaban:

• La hadal bixiyaha daryeelka caafimaadkaaga.
• Weydii xafiiska caafimaadka maskaxda ee degmadaada.
• Xubnaha Qorshaha Caymiska Caafimaadka Oregon (OHP/Medicaid) waxay heli karaan baaritaano qulub oo lacag la'aan ah. Weydii daryeel bixiyahaaga aasaasiga ah ama raadi bixiyayaasha caafimaadka maskaxda oo kuu dhow adoo la xiriiraya ururkaaga daryeelka isku-duwan (CCO).
• Haddii aadan haysan ama aadan aqoonin CCO-daada, wac adeegyada macmiilka OHP 800-273-0557.

Waxa laga filan karo inta lagu guda jiro baaritaanka qulubka

Muddada lagu jiro baaritaanka qulubka waxaad filan kartaa kuwan soo socda:

• Waxaad ka jawaabi doonta sagaal su'aalood oo taxane ah oo la yiraahdo PHQ-9. Toos ayaad u buuxin doontaa su'aalahaas ama bixiyaha daryeelka caafimaadka ayaa ku weydiin doona su'aalaha.
• Su'aaluhu waxay dabooli doonaan niyaddaada, rabitaanka cuntada, heerarka tamarta, qaababka hurdada iyo caafimaadka guud.
• Bixiyaha daryeelka caafimaadku wuxuu sidoo kale wax kaa waydiin karaa taariikha shakhsi ahaaneed iyo tan qoyskaaga ee qulubka ama arrimaha kale ee caafimaadka maskaxda.
• Bixiyaha daryeelka caafimaadka ayaa laga yaabaa inuu sameeyo baaritaan jireed si uu meesha uga saaro xaaladaha kale ee caafimaad ee laga yaabo inay saameeyaan jawigaaga.

Waxa ay tahay laga ogaado baaritaanka qulubka

Maskaxda ku hay qodobadan markaad marayso baaritaanka qulubka:

• Daacadnimada ayaa muhiim ah. Ha siin jawaabta aad "u malaynayso" bixiyaha daryeelka caafimaadku uu doonayo inuu maqlo; daacad ka noqo sida aad dareemayso dhab ahaantii.
• Baaritaan ma ahan ogaanshe kama dambays ah. Haddii su'aalaha lagu waydiiyo ay muujiyaan in laga yaabo inaad qabto qulub, bixiyaha daryeel caafimaadku wuu tixgelinayaa tan. Laakiin waxyaabo kale ayuu ka fiirsan doonaa, sida daawooyinka aad qaadato, haddii aad isticmaasho khamro ama daroogo, iyo waxa hadda ka dhacaya noloshaada si loo ogaado inaad qulub qabto.

Waa maxay macnaha natiijada baaritaanka qulubka?

Haddii bixiyaha daryeelka caafimaadkaagu uu aaminsan yahay inaadan qabin qulub, waxa uu kaala hadli doonaa waxyaabo aad sameyn karto si uu kaaga caawiyo inaad caafimaad iyo ka soo rayn u dareento.

Haddii bixiyaha daryeelka caafimaadkaagu uu aaminsan yahay in aad qabto qulub, waxa uu kaala hadli doonaa ikhtiyaarada daawaynta. In loo bilaabo daawaynta qulubka sida ugu dhakhsiyaha badan ayaa muhiim ah si uu kaaga caawiyo yaraynta astaamahaaga.

Bixiyaha daryeelka caafimaadkaagu wuxuu kuu soo jeedin karaa inuu ku qaabilo bixiye caafimaadka maskaxda ah.